يا قمر فاكر زمان

لما لسه الدنيا وادعه

لا بتقابل زول حزين

بالهموم عينيهو دامعه

لا بتغلب الزول معيشتو

لا شكيه أضاننا سامعه

تلقى كل الناس بشوشه

والوجوه بالبشرى لامعه

واليد الممدوده تسأل

ديمه بالدايراهو راجعه

بي شمم بي عفه تاخد

لا مذله ولا ضراعه

 

يا قمر طمن بلدنا

حله حله وقريه قريه

ياما ناس في الغربه كادحه

ولسه شايله الجذوه حيه

عاشقه لي ريحة ترابا

وحاضنه آمالا القويه

ما نست لمة كبارا

وفرحة العيد عن صغارا

البنيات العذارى

بي خجل ردوا التحيه

لسه فاكرين الطواري

والشواديف والصواري

فكة الريق ود عماري

أو تميراتا شويه

لسه ما ناسين بنحلب

في الدغش غنم السعيه

لسه جوانا الدليب

ونقرة الطار الشجيه

لسه عارفين كيف بنركز

لي شبابيل الصبيه